PAPPAKAINGE
Narekko mattajengngi bosi mappammula ompo siwenninna lettu
ompo tellumpenninna uleng Muharram naengka mua bosie namasero, namaraja
lempe’na, mannessani ritu tuoulumi pattaungnge namaega mua bosinna rilalenna
ritu.Jaji madeceng manengmui uruwaena tungke-tungke pananrangnge rilalenna
sitaungnge ritu. Naiyamua narekko ritajengngi bosinna pattaungengnge mappammula
ompo siwenninna lettu ompo tellumpenninna namadodong, maponco bosinna, madodong
maponco’to bosinna pananrangnge, mabaiccu’to lempe’na.Narekko ritajengngi
bosinna pattaungengnge ritu mappammula ompo siwenninna lettu ompo
tellumpenninna nade’siseng bosinna, mappannessani ritu mateului pattaungengnge,
jaji weddingngi jaji timo’e, iyarega serangnge iyanaritu ittana 3 uleng, 5
uleng, 7 uleng, iyarega timo 9 ulengna. Makkutoparo de’nappabbati sangadinna
elonapa Puangnge Jaji, Amin, Wassalam.
PAPPAKAINGEA
Naiya riasengnge Nakase Taung iyanaritu: sitaung nawawa
akkasolanna, iga-iga tau missengngi narekko maelo’i pugau seddi hajat,
pada-padanna maelo’i mappabbotting, biasa tomatoatta de’ nallorangngi ripugau,
nasaba’ mabbiasa engka akkasolanna ritu.B. Makkutoparo riasengnge Nakase
Uleng (garutu) iyanaritu 3 uleng nawawa akkasolanna. Iga-iga tau maelo pugau
seddi hajat iyarega jama-jamang pada-padanna mappabbotting iyarega maelo lao
jokka-jokka mabela (lao sompe), biasa tomatoatta de’nallorangngi riougau nasaba
mabbiasa engka ritu akkasolanna.C. Nasaba engkanna akuasangenna Puang
Allah Ta’ala, narimakkuannanaro biasa engka jaji bahaya narekko napugau’i tauwe
rilalenna ritu (esso Nakase Taung sibawa Nakase Uleng (garutu).
OMPORENNA ULENG MADECENGNGE / MAJA’E AGI-AGI MAELO
RIPUGAU RILALENNA RITU
Ompo:Siwenni :
esso anynyarang asenna, ana-ana jaji malampe sunge’i pegaui
passurong Puang, matturu’i ripajajianna, masempo dalle’i nasaba esso
ripancajinna Nabi Adam. Agi-agi pura tempeddingngi riappammulang.
Duampenni :
esso jonga asenna, najajiangngi ana’ pertama, maupe’i
namasiga mallakkai, apa iyanaritu naripancaji neneta Hawa. Agi-agi madecengnge
wedding mua ripugau, rilaoangngi sompe, runtu’ki alabang, tapi de’ nawedding
rilaoangngi mammusu.
Tellumpenni :
esso macang asenna, nakase’i nasaba esso najajiangnge Kabil
ana’na Adam. Ana-ana jaji madorakai ripajajianna, maja’i riappabbottingeng,
majai riattanengeng, rilaoangngi mabela nakennai sukkara, iyanaro naripassu’
Adam-Hawa pole ri surugana Puang Allah Ta’ala.
Eppa wenninna :
esso meyong
asenna, najajiangngi ana baraniwi, makessingngi riappanorang bine, tapi ompo
4-5-6-7-13-15-17 majai riappammulang mattaneng ase nasaba nanrei ule, makessing
muto rilaoang mabela, narekko tau kawing pangkagarengngi nadenaullei massarang,
narekko riakkalangngi inreng denariullei waja’i.
Lima ompo :
esso kalapui asenna, najajiangngi ana madorakai
ripajajianna, nakase’i de nawedding riappanorang bine.
Enneng ompo :
esso tedong asenna, makessing mua rilaoang mabela, runtu’ki
alabang, makessing muto rikawingang, najajiang ana tanra maccai mabbicara
toriolo, pugau’i passurong Puang, tapi kasi-asiwi, makessingngi riangelliang
tedong (saping) iyarega olo-kolo mawijai, makessingngi riakkabbureng wakke
nasaba teai lobbang wakke’na ritu, makessing muto riappanorang bine (ase).
Pitu ompo :
esso balawo asenna, tempeddingngi riakkalang inreng nasaba
tenriullei waja’i, maja’ toi riellauang wae galung nasaba nanrei kare ase ritu,
tapi makessingngi riakkebbureng pakkakkasa no’ ri salo’e/ri tasi’e, madeceng
muto rikawingeng nasaba weddingngi sugi.
Aruwa ompo :
esso sapingngi asenna, ana-ana jaji malomo patulungngi
ripadanna tau, masempo dalle’i, madecengngi rikawingeng nenniya
riappatettongeng bola nasaba mattiro camming asenna, madeceng muto rilaoang
sompe (tega-tega), madeceng riappammulang balu-balu.
Asera ompo :
esso asui asenna, madecengngi riappammulang mattaneng
rigalungnge sibawa waena galungnge mappammula malaki’ wae galung, mauni
sibotolo’ muna naripenre riakkeangnge, najajiangngi ana-ana madorakai
ripajajianna sibawa ri Puang Allah Ta’ala. Narekko rikawingengngi malomoi
massarang iyarega matei masitta makkunraie.
Seppulo ompo :
esso nagai asenna, maja’i riappammulang mattaneng
rigalungnge/ridare’e, makessing tosi rilaloang mangolo riarungnge, makessing
riabbottingeng, najajiangngi ana’ maupe’i.
11 ompo :
esso bembe’i asenna,
makessingngi nasaba iyanaritu nariputtama Nabi Adam ri surugae, najajiangngi
ana’ turu’, maupe’i, malampe sunge’i napugau’i passuroangna Puang Allah Ta’ala.
12 ompo :
esso gajai asenna, temmagagai tau laloe, toriwelaiye, tau
ripoleiye nasaba iya najajiang Nabi Muhammad SAW, najajiang ana maupe’i pogau’i
passuroang, madeceng riappanorang bine, agi-aginna madecengngi nasaba
barakka’na Nabitta Muhammad SAW.13 ompo :
esso singa asenna,
nakase’i (maja’i) nasaba esso ritununna api Nabi Ibrahim, ripakkerina Raja
Namrud, najajiangngi ana mabbiasai ujangeng, rilaoangngi mabela biasai
nakennaki lasa ritengnga laleng atau mateki rilaotta.
14 ompo :
esso serigala asenna,
sininna jama-jamang madecengnge salama’i ripugau, makessingngi rilaoang
mammusu, dangkang, sibawa rikawingeng nasaba iyanaritu narijajiang Nabi
Sulaiman, najajiangngi ana sugi’i.
15 ompo :
esso iti asenna, ana-ana jaji pogau’i passuroang, naniriwi
pappesangka, turu’i ripajajianna, riammasei ri padanna tau, macanti’i tappana
nasaba najajiangnge Nabi Yusuf, tempeddingngi riappatettongeng bola nasaba
teyai nasalai lasa punnana, rilaoangngi sompe nakennaki lasa atau halangeng.
16 ompo :
esso bawi asenna, nakase’i nasaba esso ribuanna Nabi Yusuf
rikalebbongnge ri padaranena, ana-ana jaji ujangengngi, agi-agi maja’i ripugau
kecuali mattaneng ikkaju ki’, mabbuai, madecengngi riakkabbureng onrong doi’
teyai lobbang.
17 ompo :
esso jarakenniai asenna, madecengngi rilaoang mangolo
riarungnge, rilaoang madduta teyai tenritarima, rilaoangngi riwanua laingnge
madecengngi.
18 ompo :
esso balipeng asenna, nakase’i nasaba esso najajiangnge Nabi
Isa, najajiangngi ana macanti’i, iyatonaro naripancaji matanna essoe, salama’i
rilaoang mabela atau sompe, narekko jajiang ana napeddiri ati tomatoanna, tapi
pogau’i passuroang Puang Allah Ta’ala.
19 ompo :
esso lancengngi asenna, najajiang ana pogau’i passurongna
Puang Allah Ta’ala, malomoi sugi, malomo atiwi ripadanna tau sibawa
ripajajianna, esso najajiangnge Nabi Yakub, makessingngi rilaoang dangkang.
20 ompo :
esso ula’ asenna, makessing ladde rilaoang madduta,
najajiangngi ana teyai tessugi, esso najajiangnge Nabi Ismail.
21 ompo :
esso tau asenna, nakase’i nasaba esso najajiangnge Fir’auna,
tau rigellie ri Puang Allah Ta’ala, narekko riappattettongengngi bola teyai
tennanre api, narekko riappammulangngi tennung atau riassapparengngi tennung
teyai tenriaddorang tau mate, ponco’na ada appakeng parewa agi-agi aja’na
naripammulai, kuaenna parewa bola tempeddingngi riala, pada-padai narekko ompo
siwenniwi akerekenna.
22 ompo :
esso aloi asenna, narekko anu madecengmua, salama’i
ripugau’, esso naripancajianna malaika’e, najajiangngi ana tanra turu’i
ripajajianna, turusitoi passurong Puang Allah Ta’ala, salama’i rilaoang sompe,
rilaoangngi mammusu ricau’i balie, ko ‘idi rilaoi idi tosi ricau’.
23 ompo :
esso incale asenna, makessingngi riabbottingeng, sawei
mawase’ki, riangelliang appakeng temmaradde’i ridi, tapi makessingngi
riangelliang balu-balu, magatti’i tarala namakessing sarona.
24 ompo :
esso balipengi asenna, makessingngi riappabbottingeng,
najajiangngi ana masempo dalle’i nasaba timunnami kedo jajisi pattujunna,
makessingto riangelliang alo-kolo nasaba mawijai ritu.
25 ompo :
esso balawoi asenna,
nakase’i nasaba nakennai lupu kampongnge, pituttaungngi tika, najajiangngi Nabi
Ibrahima, ana jaji matturu’i ri Puang Allah Ta’ala sibawa topajajianna, narekko
riappabbottingengngi teyai temmassarang, pangkagarengngi mallaibine, makessingi
rilaoang massinge pappainreng nasaba teyai tenriwaja, mauni maega muna.
26 ompo :
esso serigala asenna,
makessingi rilaoangngi sompe, riabbotingengngi ana jawiji sugi, makessing
riattanengeng agi-agi makessing maneng mui ri jama.
27 ompo :
esso Nabi asenna, makessingngi rilaoang mabela,
riappangujuang menre ritana Mekkah, makessingto riappanorang bine,
riappattettongeng bola, riakkalang inreng nasaba masitta’i riwaja,
riappakkennang pangulu bangkung, passorong bessi, riakkabbureng addeneng,
massuro mallanro kawali tappi.
28 ompo :
esso kalapu asenna, najajiang ana pogau’i passurong,
makessingngi riakkabbureng wakke olokolo nasaba mawijai, makessing to
riabbottingeng.
29 ompo :
esso sikadongngi asenna, madeceng riallantikeng tomapparenta
nasaba mattuppu batui batena mapparenta, madeceng to riangelliang balu-balu
nasaba magatti’i taralla, naekiya maja’i riangelliang appakeng nasaba nalai
pelolang atau tabbei, madecetto rilaoang sompe, riattanengeng, agi-agi
jama-jamang madeceng manengi ritu.
30 ompo :
esso manu asenna,
makessingi rilaoang dangkang nasaba salama’i iyatonaro naripaturung dalle’e
risininna ripancajie, makessingngi riellau doangeng rimunri sempajang assara’,
iyatonae esso kaminang macoa, appettung bicaratoi sininna pananrangnge
rilangi’e, ana jaji malampe sunge’i namasempo dalle’i napugau’i passuroanna
Puang Allah Ta’ala, iyatona riaseng tepu lotong.
( Sumber : Chenk Benk / Sempugi )
0 comments:
Post a Comment